Gobierno ta pidi pueblo pa duna Famia Real un caluroso bon bini

The content originally appeared on: News Americas Now

Black Immigrant Daily News

The content originally appeared on: Diario

ORANJESTAD (AAN): Prome Minister Evelyn Wever-Croes a reuni cu e comision cu a worde instala pa prepara pa e bishita Real, pa ricibi update di locual e programa ta encera.

  Rey Willem Alexander, Reina Maxima y Prinses Amalia lo ta bishitando Aruba dianan 30 di januari, 31 di januari y dia 1 di februari mainta nan ta sigui pa Curaçao. Durante di e dianan 30 y 31 di januari, tin

un programa extenso prepara.

   Prome Minister Wever-Croes a expresa cu e bunita di e programa ta, cu lo tin amplio oportunidad pa henter pueblo di Aruba por acudi y mira e famia Real, specialmente Prinses Amalia cu ta su prome biaha bishitando Aruba. Señora Nicole Hoevertsz cu ta forma parti di e comision bishita real 2023, a expresa cu a hinca un bunita programa den otro, cu diferente oportunidad unda cu pueblo por saluda e famia Real.

   Programa bishita Real: Dia 30 di juni dia cu Rey Willem Alexander, Reina Maxima y Prinses Amalia yega Aruba, nan lo sali aeropuerto y bay direccion Wilhelminapark caminda lo tin actividad y e militarnan. Na elugar ey, muchanan di scol y demas miembronan di comunidad por tey pa duna e famia Real bon bini.

Despues, Rey Willem Alexander, Reina Maxima y Prinses Amalia ta bay cerca Gobernador pa un reunion cortico.

  Siguientemente nan ta cana bay Parlamento di Aruba caminda nan lo ricibi presentacion di arte y musica di Aruba. Despues di Parlamento, e famia Real ta cana bay Bestuurskantoor y nan lo ricibi mas presentacion musical. Na Bestuurskantoor lo bay tin un reunion un poco mas extenso den Sala di Conseho di Ministronan pa papia riba e desaroyo di Aruba.

  Despues di e reunion na Bestuurskantoor, Rey Willem Alexander, Reina Maxima y Prinses Amalia lo tin momento pa nan por descansa un rato y despues prepara pa bay San Nicolas. E bishita na San Nicolas ta inicia na Filomena College caminda cu nan lo mira exposicion di Boy Ecury y despues nan lo cana den cayanan na San Nicolas pa bay museo, mira e pinturanan riba muraya y nan ta finalisa na Nicolaas Store. Eynan lo tin presentacion di arte, musica y baile pa nan por mira. Riba henter e ruta aki, henter comunidad ta bon bini pa mira y cera conoci cu nan.

   Riba e di dos dia cu Rey Willem Alexander, Reina Maxima y Prinses Amalia ta na Aruba, durante e parti mainta lo bay tin algun actividad programa cu nan mes ta haci y cu ta prepara pa nan. Y despues den oranan di atardi henter pueblo ta un biaha mas invita pa ta presente patras di Bestuurskantoor riba Plaza Padu, caminda cu lo tin Bon Bini festival. E festival lo bay ta tuma luga riba henter plaza, acompaña cu diferente presentacion, pa nan cera conoci cu hopi mas di nos isla. Despues nan ta bay Fort Zoutman pa nan mira parti di e loke ta e Bon Bini Festival y despues cu brassband nan ta sali bin pafo, y bay cu nan bus cu ta hibanan back hotel sosega.

   E siguiente dia 1 di februari parti mainta, nan ta sigui cu nan bishita den Caribe, pa Curaçao.

   Prome Minister a indica cu durante di e dos dianan cu Rey Willem Alexander, Reina Maxima y Prinses Amalia ta na Aruba, nan ta desea di ta den contacto cu hende y experiencia cosnan di Aruba. Pues di Gobierno di Aruba ta extende invitacion na henter comunidad di Aruba pa prepara agenda pa por hiba e muchanan pa conoce e famia Real di Reino Hulandes. “Ban mustranan e cordialidad cu nos conoce na Aruba, y ban duna nan un bon bini caluroso.”

   Pa conclui, Premier Wever-Croes a gradici e comision cu ta haciendo tremendo trabao. Den e proximo dianan, nan lo tin momento pa train henter e programa cual ta sigura di lo bay ta bunita hinca den otro pa ricibi e famia Real.

NewsAmericasNow.com